സംസ്ഥാനത്തെ വിദ്യാഭ്യാസ സ്ഥാപനങ്ങളില് നിന്നു വിനോദയാത്ര പോകുന്ന വാഹനങ്ങളുടെ പരിശോധനയുമായി ബന്ധപ്പെട്ട് ട്രാന്സ്പോര്ട്ട് കമ്മീഷണര് പുതുക്കിയ നിർദ്ദേശങ്ങളടങ്ങിയ നടപടിക്രമങ്ങള് പുറപ്പെടുവിച്ചു.
ഇതനുസരിച്ച് വിനോദയാത്ര പോകുന്നതിനു ഒരാഴ്ച്ച മുമ്ബ് വിദ്യാഭ്യാസ സ്ഥാപനത്തിന്റെ മേധാവി വാഹനത്തിന്റെ വിശദാംശങ്ങള് ആര്ടിഒ അല്ലെങ്കില് ജോയിന്റ് ആര്ടിഒക്ക് നല്കണം.
വിനോദയാത്ര പോകുന്നതിന് ഒരാഴ്ച്ച മുമ്ബ് വാഹന ഉടമയോ ഡ്രൈവറോ വാഹനം സംസ്ഥാനത്തെ ഏതെങ്കിലും ആര്ടിഒ അല്ലെങ്കില് ജോയിന്റ് ആര്ടിഒ മുമ്ബാകെ പരിശോധിപ്പിച്ചിരിക്കണം. നിശ്ചിത മാതൃകയിലുള്ള ഫോമില് തയാറാക്കിയ വാഹന പരിശോധനാ റിപ്പോര്ട്ടിന്റെ പകര്പ്പുകള് വാഹന ഉടമ/ഡ്രൈവര് എന്നിവര്ക്കും പരിശോധന നടത്തിയ ഉദ്യോഗസ്ഥനും വിദ്യാഭ്യാസ സ്ഥാപന മേധാവിക്കും ലഭ്യമാക്കണം. വാഹന പരിശോധനാ റിപ്പോര്ട്ട് വാഹനത്തിന്റെ ഡ്രൈവര് യാത്രയില് ഉടനീളം സൂക്ഷിക്കണം. ബന്ധപ്പെട്ട ഉദ്യോഗസ്ഥര് ആവശ്യപ്പെട്ടാല് പരിശോധനക്ക് ഹാജരാക്കുകയുംവേണം.
വാഹന പരിശോധനാ റിപ്പോര്ട്ട് ആ പ്രത്യേക വിനോദയാത്രയ്ക്ക് മാത്രമാണ് ബാധകം. വാഹന പരിശോധനയുടെ പേരില് സ്ഥാപന മേധാവികള് വാഹന ഉടമയ്ക്കോ ഡ്രൈവറിനോ അനാവശ്യ ബുദ്ധിമുട്ടുകള് സൃഷ്ടിക്കരുതെന്നും ട്രാന്സ്പോര്ട്ട് കമ്മീഷണറുടെ നിര്ദേശത്തില് പറയുന്നു.
