പോലീസിലെ ഗ്രേഡ് എസ്ഐമാര്ക്ക് വാഹന പരിശോധനയ്ക്കു നേതൃത്വം നല്കി പിഴ ഈടാക്കാന് നിയമപരമായ അധികാരമില്ലെന്നു വ്യക്തമാക്കി ആഭ്യന്തര വകുപ്പ്.
മോട്ടോര് വാഹന വകുപ്പ് ഉദ്യോഗസ്ഥരെ കൂടാതെ പോലീസിലെ എസ്ഐമാര് മുതല് മുകളിലേക്കുള്ള ഉദ്യോഗസ്ഥര്ക്കാണ് പിഴ ഈടാക്കാന് നിയമപരമായ അധികാരമുള്ളത്.
വാഹനപരിശോധനയ്ക്കും പിഴ ഈടാക്കാനുള്ള അധികാരം ഗ്രേഡ് എസ്ഐക്കും നല്കണമെന്ന സംസ്ഥാന പോലീസ് മേധാവിയുടെ ആവശ്യത്തിന്മേലാണ് ആഭ്യന്തരവകുപ്പ് നിയമപരമായ അധികാരം വ്യക്തമാക്കിയത്.
മോട്ടോര് വാഹന നിയമ ലംഘനങ്ങള് കണ്ടെത്തുന്നതിനും അവയ്ക്ക് പിഴ ഈടാക്കുന്നതിനുമുള്ള അധികാരം ഗ്രേഡ് എസ്ഐമാര്ക്കുകൂടി അനുവദിക്കണമെന്നാവശ്യപ്പെട്ട് സംസ്ഥാന പോലീസ് മേധാവി ആഭ്യന്തരവകുപ്പിനു കത്ത് നല്കിയിരുന്നു.
മോട്ടോര് വാഹന നിയമത്തിലെ 200(1) വകുപ്പ് അനുസരിച്ച് വിവിധ നിയമ ലംഘനങ്ങള്ക്ക് പിഴ ഈടാക്കുന്നതിനും രാജിയാക്കുന്നതിനും ഉദ്യോഗസ്ഥരെ ചുമതലപ്പെടുത്തിയിട്ടുണ്ട്. എന്നാല് ഗ്രേഡ് എസ്ഐമാര്ക്ക് ഈ അധികാരമില്ലെങ്കിലും പലയിടത്തും വാഹനപരിശോധനയ്ക്കായി ഗ്രേഡ് എസ്ഐമാര് നിരത്തിലിറങ്ങുകയും പലപ്പോഴും അത് വാക്കുതര്ക്കങ്ങള്ക്ക് ഈടയാക്കുകയും ചെയ്യുന്നുണ്ട്.
നിയമപരമായി ആരെങ്കിലും പോലീസിന്റെ ഇത്തരം നടപടി കോടതിയില് ചോദ്യം ചെയ്താല് അതു കൂടുതല് ഗുരുതര പ്രശ്നങ്ങള്ക്ക് ഇടയാക്കുമെന്നും ആഭ്യന്തരവകുപ്പ് വ്യക്തമാക്കുന്നു.
